Қазақстан Қарағандыда ірі күн электр стансасы ашылды
Аз ғана уақыттың ішінде салынып біткен
Қарағанды облысының Саран қаласында Орталық Азиядағы ең ірі күн электр станциясы іске қосылды. 162 гектар аумаққа 307 мың күн панелі қойылған. Барлығы автоматты түрде жұмыс істейді, деп хабарлайды 24 телеарнасының сайты.
Орталық Азиядағы ең ірі күн электр станциясын салуға 140 миллион доллар қаржы құйылған. Инвесторлардың жобаны дәл осы Саран қаласында жүзеге асыруына қолайлы климаттық жағдай себеп болыпты.
- Күн панельдерін үнемі тазалап отырудың қажеті жоқ. Қар тұрмайды, қызған кезде еріп кетеді. Ал жаз айларында шаң-тозаңды жаңбыр шаяды, - дейді компания директоры Евгений Гребенников.
Ат шаптырым аумаққа 307 мың күн панелі қойылған. Сонымен қатар 20 қосалқы станция салыныпты. Мамандардың айтуынша, оның кепілдік мерзімі – 40 жыл. Мұндағы жұмыстың барлығы автоматты түрде атқарылады. Сондықтан еңбекшілер саны да шектеулі, бар болғаны – 7 адам.
