Қазақстан Қазақстанда көкөніс бағалары өсуде
Қазан айынан бастап елде картоп, қияр, қызанақ сынды көкөністердің бағасы көтерілген
www.energyprom.kz сайты хабарлағандай, қазан айынан бастап қиярдың бағасы 26 пайызға, ал картоптың бағасы 20 пайызға, қызанақтың бағасы 18 пайызға өскен. Қазір қиярдың келісі 292,6 теңгеден, картоп 119,5 теңгеден, қызанақ 306,2 теңгеден сатылуда.
Сол сынды апельсин бағасы 568 теңгеге, банан 434,5 теңгеге өскен.
Бағаның көтерілуіне кінәлі алыпсатарлар сияқты. Мәселен, жазда оңтүстік өңірлерде жиналған орамжапырақтың келісі шаруалардан 17 теңгеден сатып алынса, базарда ол 71 теңгеден саудаланған.
Қазіргі уақытта «Атамекен» Ұлттық кәсіпкерлер палатасы көтерме сауда орындарын құру туралы ұсынысты қарастырып жатыр. Бұл орталық ауыл шаруашылық өнімдерін өндірушілер мен сатып алушылар арасында тікелей байланыс орнатпақ. Бұл бағаның төмендеуіне әсер етеді.
