Қазақстан Ақмола облысында құны 9 млрд теңгеге бағаланған дамба салынады
Ақмола облысындағы тасқыннан зардап шеккен Атбасар қаласында ескі дуалды күшейтіп, дамба құрылысын қайта бастауды жоспарлауда
Аудан әкімі Андрей Никишовтың айтуынша, күзде екі жыл бұрын салынған дуалды қайта жинау жұмыстары басталады.
- Дамбаны қайта салу сұрағы көтеріліп отыр. Оның бағасы 9 млрд теңгеге бағаланған. Жобалық-сметалық құжаттама 7 айда жасалып бітеді, - дейді А. Никишов.
Сәуір айындағы тасқын кезінде Атбасар ауданында 650 нысан суда қалса, олардың 644-і тұрғын үйлер болған.
Тексеру жұмыстары барысында 459 үй апаттық деп танылса, олардың 36-сы қираған, ал 175 үй жөндеуге келеді деп табылған.
«Таза қала Атбасар» қоғамдық бірлестігінің қайырымдылық қаражаты есебінен тұрғын үй жалдауға 218 келісімшарт орнатылған.
Жалдаудың жалпы құны 7 млн 630 мың теңге. 124 отбасыға 4 млн теңгеден астам қаражат төленді.
Сол сияқты ағымдағы жылы тұрғындарға 45 пәтерлі тұрғын үй салынады.
