Астанада Қытайдың, Бейжіңде Қазақстанның мәдени орталықтары ашылды
ҚР және ҚХР басшылары бірнеше нысанның ашылуына қатысты
![Новости Казахстана / Астанада Қытайдың, Бейжіңде Қазақстанның мәдени орталықтары ашылды Новости Казахстана / Астанада Қытайдың, Бейжіңде Қазақстанның мәдени орталықтары ашылды](/upload/iblock/254/1h5g53xmtlb8oj29ulrasbss36ogqtse/imgonline_com_ua_Resize_2Gggl7L6Ug8.jpg)
Қасым-Жомарт Тоқаев пен Си Цзиньпин Қасым-Жомарт Тоқаев пен Си Цзиньпин кеңейтілген құрамда өткен келіссөздерден кейін бірқатар нысанның салтанатты ашылу рәсіміне қатысты, деп хабарлайды Устинка LIVE тілшісі Ақордаға сілтеме жасап.
Қазақстан мен Қытай басшылары Транскаспий халықаралық көлік бағыты бойынша жүк көліктері мен теміржол контейнерлерін жөнелту рәсіміне телекөпір режимінде қатысты.
Іс-шара қатысушыларына Ұлы Жібек жолы бағытымен жүретін транзиттік рейс туралы бейнеролик көрсетілді. Шара соңында Президент Қасым-Жомарт Тоқаев пен Төраға Си Цзиньпин жүк паромдарының қозғалысын іске қосты, - деп хабарлады Ақорда.
Сонымен қатар, екі ел басшылары Қазақстанның Бейжіңдегі және Қытайдың Астанадағы мәдени орталықтарын салтанатты түрде ашты.
Бұл орталықтар екі мемлекеттің гуманитарлық ынтымақтастығын дамытудың жаңа кезеңіне жол ашады. Сондай-ақ достас екі ел халықтары арасындағы өзара түсіністікті нығайтуға бағытталған түрлі мәдени шаралар, көрмелер, дәрістер мен шеберлік сабақтарын өткізуге арналған алаңға айналады, - делінген хабарламада.
Одан өзге, Қасым-Жомарт Тоқаев пен Си Цзиньпин Астана халықаралық университетінің базасында Бейжің Тіл және мәдениет университетінің филиалын ашты.
Мұны айтулы оқиға деуге болады. Қазақстан мен Қытай жоғары оқу орындарының ынтымақтастығы студенттердің терең білім алуына және кәсіби тұрғыда өсуіне зор мүмкіндік береді және олардың тілдік дағдыларды, мәдениетаралық коммуникацияны және ғылыми зерттеу әдістерін меңгеруіне ықпал етеді, - деп хабарлады Ақорда. - Бұл жобалардың табысты жүзеге асырылуы мәдениет және білім салаларындағы өзара алмасуларды жандандыру, екі ел арасындағы саяси және экономикалық қатынастарды дамыту жолындағы маңызды қадам болмақ.