Қазақстан Қытайлық инвесторлар ШҚО-да ГЭС салуға ниет білдірді
Шығыс Қазақстан облысының әкімі Ермек Көшербаев China Huadian Corporation компаниясының өкілдерімен кездесті
Бұл кәсіпорын бүгінде әлемдегі ең үздік 500 компанияның қатарына кіреді, деп хабарлайды Устинка LIVE тілшісі ШҚО әкімінің баспасөз қызметі ақпаратына сүйеніп.
Компания энергетикамен қатар, ғылым және өнеркәсіп секторында түрлі салаларда жұмыс атқаруда. Сондай-ақ, табиғи газ қуаты арқылы электр энергиясын өндіруші негізгі алдыңғы қатарлы компания.
Аталмыш компанияның энергетика саласындағы мол тәжірибесі Шығыс Қазақстанда ГЭС салуда оң нәтиже берері анық.
Жоба бойынша қуаты 51,4 МВт болатын екі су электр станциялары Катонқарағай және Алтай аудандарында орналасады деп жоспарлануда.
Инвестор компанияның бұл салада жұмыс тәжірибесі мол. Келесі айда кәсіпорын өкілдері жобаны толық зерттеу үшін Шығыс Қазақстанға келеді, - деді ШҚО кәсіпкерлік және инновациялық-индустриялық даму басқармасының басшысы Ардақ Мәдиев.
Шетелдік компаниямен облыс аумағында осыған дейін энергетика саласында күрделі жобалар іске асқан. Соның ішінде Алтай ауданында жұмыс істеп тұрған "Тұрғысын ГЭС - 1" құрылыс жобасын атап өтуге болады.
