Қазақстан Қазақстан мен Өзбекстан трансшекаралық өзендерде су есептейтін қондырғылар орнатады
Қос мемлекет тұтынатын судың нақты көлемін есептеу үшін арнайы қондырғылар орнатуды келісті
Бұл ретте Қазақстан Өзбекстан аумағында су есептейтін құрал орнатса, өзбек тарапы біздің елде өз қондырғыларын қояды, деп хабарлайды Устинка LIVE тілшісі ҚР Су ресурстары және ирригация министрлігі ақпаратына сүйеніп.
Тараптар өзара онлайн-режимде ақпарат алмасатын болады. Қазақстан Өзбекстанның аумағында жиналған деректерге, ал өзбек жағы біздің елдегі деректерге қол жеткізе алады.
Бұл уағдаластық бірінші кезекте географиялық тұрғыдан өзендердің бастауынан тыс жатқан біздің еліміздің мүддесі үшін өте маңызды.
Қазір қос мемлекеттің сарапшылары су есептейтін қондырғылар орнатылатын орындарды келісіп жатыр. Сондай-ақ жобаға халықаралық ұйымдарды да тарту бойынша келіссөздер жүргізілуде.
Су есептейтін құралдарды орнату екі ел тұтынатын су көлемін онлайн режимде бақылауға мүмкіндік береді. Сәуір айында біз басқа да көршілес мемлекеттермен осындай жобаларды жүзеге асыру бойынша келіссөз жүргізуді бастауға ниеттіміз, - деді Су ресурстары және ирригация министрі Нұржан Нұржігітов.
