Қазақстан Атырау облысында жол апаты салдарынан 7 адам қаза тапты
Бетпе-бет соқтығысқан екі көліктің жүргізушісі бұрын бірнеше рет жылдамдықты асырғаны үшін жауапқа тартылған
Екі көліктің соқтығысуы салдарынан жеті адам оқиға орнында көз жұмып, тек екі адам аман қалған, деп хабарлады Polisia.kz.
16 шілде күні сағат 15.00 шамасында Доссор-Құлсары-Бейнеу тасжолының 82 шақырым тұсында маркасы Chevrolet Cobalt автокөлігі қарсы бағытта келе жатқан Toyota Ipsum автокөлігіне соқтығысып, жол-көлік оқиғасы орын алды, - делінген хабарламада.
Соққы салдарынан Chevrolet Cobalt көлігінің жүргізушісі мен 4 жолаушысы, Toyota Ipsum көлігінің жүргізушісі мен 1 жолаушысы оқиға орнында қаза тауып, 2 жолаушысы түрлі дене жарақатымен Жылыой аудандық ауруханаға жеткізілді. Қазіргі уақытта тиісті іс-құжаттар жинақталуда.
Аталған екі автокөліктің жүргізушілері бұрын бірнеше рет көлік жылдамдығын шамадан тыс арттырғаны үшін жауапкершілікке тартылғаны анықталды, - деді Атырау облысы полиция департаменті жанындағы патрульдік ротасының командирі полиция капитаны Әділбек Шахметов.
