Қазақстан Зейнеткердің банк картасынан 6 миллионнан астам ақша шешіп алған
Теміртаулық қарияны тонаған өзіне көмектесіп жүрген танысы болып шықты
Теміртау қаласындағы полиция қызметіне 82 жастағы зейнеткер жүгінген, деп хабарлады Polisia.kz.
Ол біреудің банк қосымшасы арқылы есепшотындағы 6 млн 175 мың теңгесін шешіп алғандығын айтып шағымданған. Бұл туралы зейнеткер банктен есеп шотында ақша қалмағаны туралы хабарлама келгенде білген.
Криминалдық полиция қызметкерлері осы іске қатысы бар деген күдікпен 24 жастағы азаматты ұстады, - делінген хабарламада. - Белгілі болғандай, күдікті зейнеткердің танысы болып шықты. Ол жәбірленушіге үнемі көмектесіп, дүкенге барып азық-түлік алған уақытта зейнеткердің банк картасы арқылы төлемақы жасаған. Жәбірленушінің есепшотындағы ақшаны шешіп алу үшін басқа шотқа бірнеше рет ақша аударып, кейін оны шешіп алғандығын мойындады.
ҚР ҚК 188-бабына сәйкес қылмыстық іс қозғалып, тергеу әрекеттері жүргізіліп жатыр.
