Қазақстан Өрт кезінде Семейге көшірілген бородулихалық балалар емтиханды қалай тапсырады?
Абай облысындағы өрт салдарынан эвакуацияланғандар арасында 64 бала бар
Бұл туралы ҚР Оқу-ағарту министрі өзінің Фейсбуктегі парақшасында жазды, деп хабарлайды Устинка LIVE тілшісі.
Министрліктің аумақтық департаментінің, Балалардың құқықтарын қорғау комитетінің және облыстық білім басқармасының өкілдері балалармен жұмыстар жүргізуде.
Балалардың құқықтарын қорғау комитеті төрағасына асыраушысынан айырылған отбасылармен жеке кездесіп, балалардың психологиялық кеңес алуына, жазғы сауықтыру лагерлерінде демалуына барлық жағдайларды ұйымдастыру тапсырылды, - дейді Ғани Бейсембаев.
Қауіпсіз аймаққа эвакуацияланған тұрғындардың арасында 64 бала бар. Бүгінде олар отбасыларымен бірге Семей қаласындағы екі колледж ғимаратына орналастырылған.
Сондай-ақ, эвакуацияланған 9, 11-сынып түлектерінің қорытынды емтиханды кедергісіз тапсыруы үшін барлық жағдай жасалуда - мектеп бітіру емтихандары Семей қаласында ұйымдастырылады, - деп жазды министр.
Одан бөлек, ведомство басшысы апат салдарынан асыраушысынан айырылған отбасы балалары жаңа оқу жылында білім алуын еш кедергісіз жалғастыруы үшін мектеп формасымен, қажетті оқу құралдарымен және ыстық тамақпен қамтылатынын айтты. Балалардың құқықтарын қорғау мен қауіпсіздігін қамтамасыз ету министрліктің үнемі бақылауында.
