Қазанда "Қазақстанның халық әртісі" атағы қайта беріле бастайды

Биыл қазан айында – Республика күнінде осы атаққа лайықты мәдениет қайраткерлерінің алғашқы тобы марапатталады.

Мәдениет саласындағы саясатты жан-жақты ойластырып жүргізу керек, деп есептейді Қазақстан президенті Қасым-Жомарт Тоқаев.

Қазір бұл саланы өркендету үшін жаңа тұжырымдама жасалып жатыр. Бұл құжат еліміздің мәдени мұрасын сақтау, насихаттау және ұлттық бірегейлікті нығайту ісінде шешуші рөл атқарады деп сенемін, - деген еді Тоқаев VIII сайланған парламенттің бірінші сессиясының ашылуында сөйлеген сөзінде.

Президент шығармашыл зиялы қауым көпшіліктің көңілінен шығатын, мемлекеттің мүддесіне сай келетін туындылар ұсынады деген үмітте екенін жасырмады.

Осы ретте креативті индустрияға жүйелі қолдау көрсету өте маңызды. Адам капиталын тұрақты дамыту жылдам өзгеріп жатқан қазіргі әлемде табысты ел болудың басты кепілі болады деп санаймын. Біз ұлттың жаңа сапасын қалыптастыру арқылы әділетті мемлекеттің және үйлесімді қоғамның негізін қалаймыз, - деп толықтырды ол.