Қазақстан Жәнібек Әлімханұлының келесі жекпе-жегі мамырда өтеді
WBO нұсқасы бойынша орта салмақтағы әлем чемпионының бұл жолы кіммен жұдырықтасатыны белгілі болды
Бұл туралы Жәнібек Әлімханұлының менеджері Берік Сұлтан өзінің Facebook парақшасында жазды.
Бұйыртса, жекпе-жек 13 мамырда өтеді. Жәнібек Әлімханұлы WBO чемпиондық титулын екінші рет қорғайды. Қарсыласы канадалық Стивен Батлер. Жасы 27-де. Рекорды: 32 жеңіс, 3 жеңіліс. WBO рейтингінде 6 орындағы қарсылас. Тартысты кездесу күтіп тұр! Qazaq style-ға сәттілік! Жеңісті күнде жүздесейік! - деп жазды Берік Сұлтан.
Еске сала кетейік, Жәнібек ең соңғы жекпе-жегін былтыр қарашада Лас-Вегаста өткізіп, төрешілердің шешімімен британдық боксшы Дензел Бентлиден басым түсті. Осылайша WBO белбеуін қорғап қалды. Титулдың өзі қазақстандыққа америкалық боксшы Деметриус Андрадеден «мұрагерлік жолмен» келген болатын. Ол Әлімханұлымен айқасудан бас тартып, екінші орта дивизиондағы мансабын жалғастыруды құп көрді.