Қазақстан Үкімет Мұғалімдер күні туралы Қаулыны қабылдады
Ұстаздардың төл мерекесі 5 қазан болып бекітілді
Бұл туралы ҚР Оқу-ағарту министрлігі мәлімдеді, деп хабарлайды Устинка LIVE тілшісі Tengrinews.kz-ке сілтеме жасап.
Мемлекеттік мерекелер тізіміне сәйкес, республикада Мұғалімдер күні осы уақытқа дейін қазанның бірінші жексенбісінде тойланып келді. Енді бұл мереке 5 қазанда әлемнің 100-ден аса елі атап өтетін Дүниежүзілік мұғалімдер күнімен сәйкестендірілді, - делінген Үкімет сайтында.
Мұғалімдер күні – білім беру саласындағы қызметкерлердің барлығына ортақ кәсіби мереке. Бұл күні ұстаздар қауымының қоғам дамуындағы рөлі мен еңбегі, оған қосатын зор үлесі аталып өтіледі, - делінген хабарламада.
Оқу-ағарту министрлігі мәліметінше, бүгінде Қазақстанда мектепке дейінгі, орта, техникалық және кәсіптік білім беру ұйымдарында 556 мың педагог еңбек етеді.