ҚР ТЖМ академиясына оқуға енді қыздар да қабылданады

ҚР ТЖМ М. Ғабдуллин атындағы Азаматтық қорғау академиясына оқуға қабылдау басталды, деп хабарлайды Устинка LIVE тілшісі ШҚО ТЖД баспасөз қызметіне сілтеме жасап.

ҚР ТЖМ М. Ғабдулин атындағы Азаматтық қорғау академиясына күндізгі оқу нысанына орта білімі бар, он алты жасқа толған, денсаулық жағдайы бойынша әскери қызметке және оқуға жарамды Қазақстан Республикасының азаматтары (ұлдар мен қыздар) қабылданады. Академияға қабылдау медициналық, физикалық және психофизиологиялық көрсеткіштер бойынша іріктеу нәтижелерін ескере отырып, ҰБТ сертификатының балдарына сәйкес конкурс бойынша жүргізіледі, - деп хабарлады ШҚО ТЖД баспасөз қызметі.

Академияда оқу шарттары: курсанттарды оқыту, республикалық бюджет қаражаты есебінен жүзеге асырылады. Курсанттар барлық оқу кезеңіне тегін киім-кешекпен, тамақпен және мемлекеттік стипендиямен қамтамасыз етіледі. Сондай-ақ курсанттарға демалыс кезінде жол жүру ақысы төленеді. Оқу мерзімі - 4 жыл. Оқу уақыты мен мерзімі әскери қызмет өткерумен теңестіріледі.

Басты жаңалық – биылдан бастап азаматтық қорғау академиясына оқуға қыздар қабылданады.

Академияға түсуге ниет білдірген азаматтар тұрғылықты жері бойынша аумақтық Төтенше жағдайлар департаментінің кадр саясаты бөлімшелеріне өтініш (еркін нысанда) береді.

Толық ақпарат алу үшін ШҚО ТЖД кадр саясаты бөліміне 25-07-94 телефоны арқылы хабарласуға болады.