Қазақстан ШҚО-дағы кеніштер алдағы 10 жылда сарқылады
Елімізде шикізатқа сұраныстың артуына байланысты жаңа кен орындарын іздеп-табу қажеттігі туып отыр
Премьер-Министр Әлихан Смайылов Шығыс Қазақстандағы ірі кеніштердің сарқыла бастағанына алаңдаушылық білдірді, деп хабарлайды Устинка LIVE ҚазАқпаратқа сілтеме жасап.
Еліміз өзінің табиғи артықшылығын толықтай пайдалана алмай отыр. Соңғы жылдары пайдалы қазбалардың көптеген түрі бойынша жаңа қорларды ашу жұмыстары мардымсыз жүруде. Мысалы, таяу онжылдықта Шығыс Қазақстанда Орлов, Малеев, Тишинское және Риддер-Сокольное сияқты ірі металл кен орындары сарқылады, - деді Үкімет басшысы.
Оның пайымынша, өнеркәсіп шикізатына сұраныстың өсуі жаңа кен орындарын іздеп-тауып, минералдық-шикізат базасын кешенді дамытуды талап етеді.
Осыған байланысты геологиялық барлау саласына инвестициялар тарту үшін тиісті жағдай жасау қажет. Инвесторларға кешенді сервистік қолдау көрсету мақсатында Ұлттық геологиялық қызмет құрылды, - деді Әлихан Смайылов.