Қазақстан Сайлау алдындағы телевизиялық дебатқа Тоқаев қатыспайды
11 қарашада президенттікке үміткерлердің қатысуымен телевизиялық дебат өтеді
Қасым-Жомарт Тоқаевтың орнына оның сенімді өкілі Ерлан Қошанов қатысатыны Орталық сайлау комиссиясының отырысында белгілі болды, деп хабарлайды, Устинка LIVE сайты.
Сайлау алдындағы телевизиялық пікірсайыстар мен пікірталас 11 қарашада сағат 20.00-де "Хабар" телеарнасында тікелей эфирде өтеді. Дебат тікелей эфирде кешкі сағат сегізде басталады. Телевизиялық дебаттың ұзақтығы 80 минуттан кем емес. Пікірталас екі тілде өтеді, кім қай тілді таңдайды, сол тілде сөйлейді. Телевизиялық дебат төрт раундтан тұрады.
Бірінші раунд – сайлау алдындағы бағдарламаның тұсаукесері. Әр қатысушы өз сайлауалды бағдарламасын ұсыну мақсатында сөз сөйлейді.
Екінші раунд – пікірталас сессиясы. Қатысушылар қарсыластарына екі сұрақ қояды, сонымен қатар екі сұраққа жауап береді.
Үшінші раунд – сайлаушылардың сұрақтары. Әр кандидатқа бір сұрақ қойылады.
Төртінші раунд – сайлаушыларға үндеу. Қатысушылар сайлаушыларға тікелей жүгінеді.
Телевизиялық дебатқа қатысатындар:
1. Қарақат Әбден;
2. Нұрлан Әуесбаев;
3. Жигули Дайрабаев;
4. Мейрам Қажыкен;
5. Ерлан Қошанов;
6. Салтанат Тұрсынбекова.
Кезектен тыс президент сайлауы 20 қарашада өтетінін еске саламыз.