Венгрия Еуроодақ елдерінің ішінде бірінші болып қазақстандық вакцинация паспортын мойындады

Қазақстан елшісі Жәнібек Әбдірашов пен Венгрия Мемлекеттік хатшысының орынбасары Андраш Барани екі ел арасындағы вакцинация сертификаттарын / паспорттарын өзара мойындау туралы келіссөз ноталармен алмасты, деп хабарлады Қазақстан СІМ баспасөз қызметі.

Иммундау сертификаттарының болуы екі елдің азаматтарына Covid-19 таралуын болдырмауға бағытталған шектеу шараларынсыз (ПТР тест және карантин) Қазақстанға және Венгрияға кіруге кепілдік береді. Оларды өзара тану Будапешт пен Нұр-сұлтан арасындағы шекараларды ашудың және тікелей әуе қатынасын қалпына келтірудің маңызды қадамдарының бірі болып табылады.

- Осылайша, Венгрия қазақстандық вакцинация сертификаттарын/паспорттарын мойындаған Еуропалық одақтың алғашқы елі болды, - деп атап өтті СІМ-де.