Коронавирусқа қарсы екпе қабылдаған қазақстандықтардың саны екі миллионнан асты

Қазақстанда COVID-19 вакцинасының алғашқы компонентін 2 миллионнан астам адам алды, деп хабарлады республиканың денсаулық сақтау министрі Алексей Цой.

- Бүгінгі таңда вакцинаның шамамен 3 млн дозасы пайдаланылды, оның ішінде бірінші компонентпен 2 015 053 адам егілді, бұл тиісті халықтың 20%-ын құрайды. Екінші компонентпен 949 802 адам қамтылды, - деді Цой сейсенбі күні Үкімет отырысында. - Бүгінгі таңда егу пункттерінде вакцина дозаларының жеткілікті саны бар: бірінші компоненттің шамамен 320 мыңы және екінші компоненттің 650 мыңы. Қарағанды фармацевтикалық зауытында қосымша 1,7 млн доза "Спутник V" вакцинасы өндірілді және кестеге сәйкес өңірлерге жеткізіледі, - деп хабарлады ол.

Қазақстан халқын COVID-19-дан вакцинациялау 1 ақпанда басталды. Бастапқыда екпелер Қазақстанға әкелінген ресейлік "Спутник V" вакцинасымен қойылды, ал 23 ақпанда вакцинация процесіне Қарағандыда өндірілген ресейлік препарат қосылды. 26 сәуірде Халықты "QazVac" вакцинасымен вакцинациялау басталды. Бұдан басқа, бірыңғай дистрибьютор БАӘ-де өндірілген қытайлық "Sinopharm" компаниясының вакцинасын сатып алды.

Қазақстан халқы 18,9 млн адамнан асады, 10 млн-нан астам адам коронавирусқа қарсы егілуге жатады.