"Спутник V" екпесінің 150 мыңға жуық дәрісі Қарағанды қаласынан Нұр-Сұлтан қаласына жеткізілді

"Sputnik V" екпесінің кезекті шығарылымы еліміздің астанасына жіберілді, деп хабарлайды Қарағанды фармацевтикалық кешенінің баспасөз қызметі.

- Қарағанды фармацевтикалық кешені елорда тұрғындарын вакцинациялау үшін "Sputnik V" екінші кезеңіне арналған кезекті траншын жөнелтті. Жалпы алғанда, Нұр-Сұлтан қаласы 148 745 доза алады, - делінген ресми мәліметте.

Баспасөз қызметі дәрі-дәрмекті тасымалдаудың маңызды шарты салқын жерде сақтау екенін атап өтті. Қазақстан тұрғындарын COVID-19-тан вакцинациялау 1 ақпанда басталған болатын. Бастапқыда Қазақстанға әкелінген ресейлік Sputnik V екпелері салынып жүрсе, 23 ақпаннан бастап ресейлік дәрі-дәрмек өнімі Қарағандыда шығарыла бастады.

Коронавирусқа қарсы екпе елдің 18 жастан асқан және дәріге қарсы көрсетілімдері жоқ, екпе алуға мүдделі барлық азаматтарға тегін салынады. Қазақстан халқының саны 18,9 миллионнан астам. Оның 10 миллионнан астамы коронавирусқа қарсы екпе салдыруы керек.