Қасым-Жомарт Тоқаев "Спутник V" екпесін салдыртты

Қазақстан Республикасының президенті өткен сейсенбі күні коронавирусқа қарсы "Спутник V" вакцинасын қабылдады.

- Бүгін Мемлекет басшысы Қарағанды фармацевтикалық зауыты шығарған Sputnik-V вакцинасын алды. Вакцинациядан кейін оның денсаулығы жақсы. Жанама әсерлері жоқ. Президент тек Қазақстан азаматтарына вакцина егу және ұжымдық иммунитетті қалыптастыру бізге коронавирусты жеңуге, барлық шектеулерді алып тастауға, азаматтардың қарапайым өмірі мен экономикалық белсенділіктің қалпына келуін қамтамасыз етуге мүмкіндік беретініне сенімді, - деп жазды ҚР Президентінің баспасөз хатшысы Берік Уәли әлеуметтік желідегі парақшасында.

Сонымен қатар, Қасым-Жомарт Тоқаев барша қазақстандықтарды мүмкіндігінше тез арада алғашқылардың бірі болып вакцина салдыруға шақырды.

Президентіміз бұған дейін де ауруға қарсы отандық екпе салдыратынын айтқан болатын.

- Біз отандық вакцинаны сынаудың оң нәтижесіне үміттіміз. Бұл жағдайда, егер ол жақсы нәтиже берсе, мен қазақстандық вакцинаны егемін, - деді Тоқаев.