БҚО-да 10 шақырымдық жүк көліктерінің кептелісі орын алды

Батыс Қазақстан облысында Самара-Шымкент тас жолында 59 жүк көлігі қар құрсауынан шығарылды, тағы 175-і кептелісте қалып отыр, деп хабарлады облыстық ТЖ департаментінің баспасөз қызметі.

- Сағат 10.30-дағы жағдай бойынша ТЖД күшімен автожолдың тазартылған учаскесіне 5 үлкен жүк көлігі шығарылды және 54 бірлік техника Жымпиты кентіне жылыту пунктіне эвакуацияланды. Ақтөбе облысы бағытында тұрған ұзындығы 10 км 175 ауыр жүк көлігі кептелісте қалып отыр. Жеңіл автокөліктер жоқ, - делінген хабарламада.

Мекемеде нақтылағандай, қазіргі уақытта Ақтөбе облысына қарай бір жолақ ашылды, онда жиналған ауыр жүк көліктері кезек-кезек жөнелтіледі.

ТЖД мәліметінше, Самара-Шымкент тас жолының 489-522 шақырымында жолдың әртүрлі учаскелерінде шамамен 300 жүк көлігі мен 50 автомобиль кептеліске ұшыраған.