Қазақстанның бірнеше қаласынан ұйымдастақ қылмыстық топ өкілдері ұсталды

ҚР Ұлттық қауіпсіздік комитеті Ішкі істер министрлігімен бірлесіп, "А" және "Бүркіт" арнайы бөлімшелерін тарта отырып, астана төңірегінде жұртты қорқытып, рейдерлікпен және қару саудасымен айналысқан "Әлібековтер", "Ибрагимовтер" және "Махмудовтар" ұйымдасқан қылмыстық тобының аса қауіпті әрекетінің жолын кесті, деп хабарлайды ҚР ҰҚК баспасөз қызметі.

Нұр-Сұлтан, Алматы, Ақтөбе және Қостанай қалаларындағы арнайы операция шеңберінде аталған топтардың 15 жетекшісі мен белсенді мүшелері ұсталды, олардың біреуі Ресей Федерациясында бандитизм мен адам өлтіргені үшін халықаралық іздестіруде болатын. Атыс қаруының, оқ-дәрілер мен гранаталардың арсеналы алынды.

Ұсталғандар Нұр-Сұлтан қаласы Полиция департаментінің уақытша ұстау изоляторына қамалып, қолда бар дәлелдемелерді бекіту және қылмыстық әрекеттің өзге де эпизодтарын анықтау бойынша тергеу іс-шаралары жүргізілуде.

 Карантиндік шектеулер жағдайында қылмыстық топтар өздерінің қылмыстық белсенділігін төмендетпей, экономикалық қиындыққа тап болған кәсіпкерлерден қорқытып алумен және рейдерлікпен айналысуды жалғастырған. 

Бөтеннің мүлкін алып қою кезінде олар атыс қаруы мен дене күшін қолдану арқылы дөрекілік пен қатыгездік танытқан. 

Осы жағдайларда ел басшылығы құзыретті органдар үшін бейбіт азаматтарға бандиттік элементтер тарапынан қауіп-қатерлерді жою, қоғамның 90-жылдардағы "рэкетирлікке" қарай құлдырауына жол бермеу бойынша міндеттерді басымдылықтар қатарына қойып отыр. 

Арнаулы қызметтер мен полицияның қылмыстық топтардың жоспарлары мен ниеттерін анықтау және оның жолын кесу бойынша жүйелі жұмысы жалғасуда.