2019 жылы Қазақстан кәсіпорындарында қанша адам қаза болғаны белгілі болды

Биылғы жылдың он айында Қазақстандағы кәсіпорындарда мыңнан астам адам зардап шекті, оның 129-ы қаза болды

Бұл туралы Еңбек және халықты әлеуметтік қорғау министрі Біржан Нұрымбетов хабарлады.

- Ағымдағы жылдың 10 айында республика кәсіпорындарында 1069 адам зардап шекті, бұл 2018 жылдың сәйкес кезеңімен салыстырғанда 13,2%-ға төмен. Оның ішінде 129 адам қаза тапты,бұл өткен жылдың көрсеткіштерінен 22,8%-ға төмен, - деп Еңбек министрлігінің баспасөз қызметі хабарлады.

Министрдің сөзі баяндалған баспасөз хабарламасы сенбі күні таралды.

Аталған деректерді Нұрымбетов Алматы облысындағы "Жетісу су құбыры" МКК ұжымымен кездесу барысында хабарлады.

Министрдің айтуынша, қауіпсіз еңбек жағдайларының, жеке және ұжымдық қорғану құралдарының болмауы жазатайым оқиғалардың негізгі себептері болды.

Ведомство басшысының пікірінше, коммуналдық шаруашылық кәсіпорындарында еңбек қауіпсіздігі мен еңбекті қорғау талаптарын сақтау ерекше алаңдаушылық тудырады, онда жыл сайын су құбыры мен кәріз жүйелерін жөндеу кезінде адамдар қаза болады.

- Биылғы жылы республиканың коммуналдық шаруашылық кәсіпорындарында 46 қызметкер зардап шекті,оның 11-і қаза болды. (...) Аса қауіпті жұмыстарды жүзеге асыру кезінде қауіпсіздік техникасы ережелерін өрескел бұзу және канализациялық газ қоспасымен қатты улану жазатайым оқиғалардың себептері болды, - деп атап өтті министр кездесуде.

Осындай жазатайым оқиғалардың алдын алу үшін министрлік коммуналдық шаруашылық кәсіпорындарының тізімін дайындады, оларға қатысты Бас прокуратураға жоспардан тыс тексерулер жүргізу туралы ұсыныс жасайды.

Сондай-ақ, осы мақсатта ведомство заңнамаға түзетулер әзірлеуде.