Қазақстан Зорлық-зомбылық көрген балаларға кешенді көмек көрсететін кабинеттер ашылады
Бұл кабинеттерде кәмелетке толмағандарға "бір терезе" қағидаты бойынша кешенді қолдау көрсетіледі
Яғни, психологиялық көмектен бастап, сот-медициналық сараптама, бейінді мамандардың қатысуымен сауалнама сынды қажетті қызметтер бір жірде көрсетіледі, деп хабарлайды Устинка LIVE тілшісі ҚР Оқу-ағарту министрлігі ақпаратына сүйеніп.
Аталған жаңашылдық 2025 жылғы 30 желтоқсанда Мемлекет басшысы қол қойған "Құқық бұзушылықтардың алдын алу туралы" Қазақстан Республикасының Заңында көзделген. Норма 2026 жылғы 2 наурыздан бастап күшіне енеді. Жақын арада кабинеттердің қызмет қағидалары бекітіліп, содан кейін өңірлерде оларды кезең-кезеңімен ашу жоспарлануда.
Сонымен қатар заң аясында зорлық-зомбылыққа, қатыгездікке, буллингке ұшыраған немесе оның куәсі болған кәмелетке толмағандарды анықтау және оларға көмек көрсету қағидалары әзірленді. Құжат осындай балаларды анықтау тәртібін, оларға көмек көрсету тетіктерін, сондай-ақ мемлекеттік органдардың, білім беру ұйымдарының, 111 байланыс орталығының, Бала құқықтары жөніндегі уәкіл мен өңірлік уәкілдердің өзара іс-қимыл алгоритмдерін айқындайды. Бұл ведомствоаралық жедел әрекет етуге және балаларға уақтылы кешенді көмек көрсетуге мүмкіндік бермек, - делінген министрлік ақпаратында.