Қазақстан ШҚО–Үрімші бағытында тікелей әуе рейсін ашу мүмкіндігі қарастырылуда
ҚХР-дағы Синьцзян әуежайлар тобы ("XINJIANG AIRPORT GROUP CO., LTD.") шығысқазақстандықтарды осы мәселені талқылау үшін ресми түрде шақыртқан
ШҚО туризм басқармасының, жолаушылар көлігі және автомобиль жолдары басқармасының басшылары мен "Өскемен әуежайы" АҚ президенті, "Ертіс" ӘКК" АҚ Басқарма төрағасы Үрімші қаласына жұмыс сапарымен барды, деп хабарлайды Устинка LIVE тілшісі.
Бұл бастама – өңірдің көлік-логистикалық қолжетімділігін арттыруға бағытталған маңызды қадам. Тікелей әуе қатынасы Шығыс Қазақстанның туристік әлеуетін жаңа деңгейге көтеріп, трансшекаралық туризмді дамытуға серпін бермек. Сонымен қатар, іскерлік байланыстарды кеңейтуге, инвестициялық және сауда-экономикалық ынтымақтастықты күшейтуге мүмкіндік ашады.
Сала мамандарының айтуынша, әуе қатынасының ашылуы экспортқа бағытталған өңір кәсіпорындары үшін логистикалық шығындарды қысқартуға, жеткізу мерзімін оңтайландыруға және жаңа нарықтарға шығуға жол ашады. Туризм, қызмет көрсету және шағын бизнес секторлары үшін де мультипликативтік әсер күтіледі.
Бүгінде Шығыс Қазақстан өңірі көлік инфрақұрылымын жаңғырту және халықаралық дәліздерге кірігу бағытында жүйелі жұмыстар жүргізуде. Өскемен әуежайының әлеуетін арттыру, автомобиль жолдарын жаңарту және шекара маңы ынтымақтастығын дамыту – осы саясаттың құрамдас бөлігі. Осы тұрғыда Үрімші бағыты – экономикалық және стратегиялық тұрғыдан өзекті жоба.