Қазақстан Қазақстандық суперкомпьютер әлемдегі үздік жүздік қатарында
Ұлттық суперкомпьютер "Alem.Cloud" әлемдегі ең қуатты есептеу жүйелерінің халықаралық рейтингі TOP500 тізімінде 86-шы орынды иеленді
ҚР Жасанды интеллект және цифрлық даму министрлігі мәлімдегендей, бұл рейтингке тек HPL (High-Performance Linpack) стандарты бойынша тәуелсіз тестілеуден өткен, яғни әлемдік деңгейде мойындалған есептеу өнімділігіне ие кластерлер ғана енгізіледі, деп хабарлайды Устинка LIVE тілшісі.
"Alem.Cloud" ұлттық суперкомпьютер кластері Мемлекет басшысының тапсырмасы бойынша құрылған. Суперкомпьютер жасанды интеллект, жоғары өнімді есептеулер және үлкен деректерді талдау бағыттарындағы жобаларды іске асыруға арналған. Кластердің архитектурасы жоғары тығыздықтағы бірыңғай GPU-кешеніне біріктірілген 64 HPE Cray серверінің базасында іске қосылған. Әрбір есептеу торабы жоғары жылдамдықты қамтамасыз ететін NVIDIA H200-бен жабдықталған, - деп хабарлады ҚР Жасанды интеллект және цифрлық даму министрлігі.
Alem.Cloud суперкомпьютері жобасы Біріккен Араб Әмірліктеріндегі G42 тобына кіретін Presight халықаралық технологиялық компаниясымен бірлесіп жүзеге асырылды. Presight жоғары өнімді есептеу кластерлерін жобалау мен AI экожүйесін дамытуға техникалық қолдау көрсетіп, әлемдік үздік тәжірибелерді Қазақстанның қажеттіліктеріне бейімдеуге мүмкіндік берді.