Қазақстан Дәмхана қызметкерлері 13 миллион теңге жымқырған
Дәмхана кассасынан мамыр-желтоқсан аралығында қомақты қаржы жоғалған
Анықталғандай екі қызметкер қаражатты өз жеке шоттарына аударып отырған, деп хабарлайды Устинка LIVE тілшісі.
Абай облысындағы танымал кафе желісінің иесі "Kaspi Pay" шотындағы қаражаттың жетіспеушілігін байқап, полицияға жүгінді. Кәсіпкердің айтуынша, 2024 жылдың мамырынан желтоқсанына дейін кассадан 13 миллион теңгеден астам қаражат жоғалған, - деп хабарлады Абай облыстық ПД баспасөз қызметі. - Тергеу барысында бұл қаражаттың екі қызметкердің жеке шоттарына тұрақты түрде аударылып отырғаны анықталды. Күдіктілер басшылықтың рұқсатынсыз, мобильді қосымша арқылы аударым жасап, мекеменің қаржысын өз мақсаттарына пайдаланған.
Полицейлер күдіктілерді жылдам анықтап, оларды бөлімшеге жеткізді. Жұмысшылар өз кінәсін мойындағанымен, ұрланған қаражатты қайтара алмады – олардың айтуынша, бүкіл сома жеке қажеттіліктеріне жұмсалған.
Қазіргі уақытта сотқа дейінгі тергеу жүргізілуде. Күдіктілерге қатысты келу міндеттемесі түріндегі бұлтартпау шарасы қолданылды.