Қазақстан Айгерім Зайнолдинова кеше, 12:00

Қазақстанда зейнетақы мен жәрдемақы мөлшері өсті

ҚР Еңбек және халықты әлеуметтік қорғау министрлігінің хабарлауынша 1-ші қаңтардан бастап мемлекеттік жәрдемақылар мен базалық зейнетақы төлемдерінің барлық түрінің мөлшері ұлғайтылды

Фото:

pixabay.com

2025 жылдың 1-ші қаңтарынан бастап базалық зейнетақының ең төмен мөлшері 32 360 теңгені құраса, оның ең жоғары мөлшері 50 851 теңгені құрайды, деп хабарлайды Устинка LIVE тілшісі ҚР Еңбек және халықты әлеуметтік қорғау министрлігінің баспасөз қызметіне сілтеме жасап.

2019 жылы зейнеткерлікке шыққан 69 жастағы зейнеткердің 2024 жылы бюджеттен төленетін зейнетақы мөлшері 156 856 теңгені құрады, оның ішінде базалық зейнетақы төлемі – 45 578 теңге, ынтымақты зейнетақы – 111 278 теңге. Ағымдағы жылдың 1-ші қаңтарынан бастап өсімді ескере отырып, осы зейнеткер үшін зейнетақының жалпы сомасы 171 588 теңгеге дейін ұлғайды, оның ішінде базалық зейнетақы – 50 851 теңгені, ынтымақты зейнетақы – 120 737 теңгені құрады. Аталған сомаларға БЖЗҚ-дағы төлемдер кірмейтінін атап өту маңызды, - деп хабарлады ҚР Еңбек және халықты әлеуметтік қорғау министрлігі.

1-ші қаңтардан бастап мемлекеттік мына жәрдемақылар өскен:

1, 2, 3 бала туғанда берілетін жәрдемақы 140 296 теңгеден 149 416 теңгеге дейін, 4 және одан да көп бала туғанда берілетін жәрдемақы – 232 596 теңгеден 247 716 теңгеге дейін ұлғайды;

Мөлшері балалар санына байланысты берілетін көпбалалы отбасыларға арналған жәрдемақы 4 баласы бар отбасылар үшін 59 183 теңгеден 63 030 теңгеге дейін, 10 баласы бар отбасылар үшін – 147 680 теңгеден 157 280 теңгеге дейін артты;

I- топ мүгедектігі бар адамдарға арналған жәрдемақы 95 496 теңгеден 101 702 теңгеге дейін, II топ – 76 397 теңгеден 81 362 теңгеге дейін, III топ – 52 089 теңгеден 55 474 теңгеге дейін өсті.

Сондай-ақ, Мемлекеттік әлеуметтік сақтандыру қорынан асыраушысынан айырылу және еңбекке қабілеттілігінен айырылу бойынша төлемдер мөлшері 6,5 %-ға артқан. Аталған төлемдер міндетті әлеуметтік сақтандыру жүйесіне қатысушыларға бюджеттен берілетін мемлекеттік жәрдемақыларға қосымша жүзеге асырылады.

Төлемдердің мөлшері жеке санаттарға және келесілерге байланысты болады:

соңғы 2 жылда МӘСҚ-ға әлеуметтік аударымдар жүргізілген орташа айлық табыс;

еңбекке қабілеттілігінен айырылу коэффициенттері;

асырауындағы адамдар саны;

міндетті әлеуметтік сақтандыру жүйесіне қатысу өтілі және табысты алмастыру.

Тақырыптар: Қазақстан ҚР Еңбек және халықты әлеуметтік қорғау министрлігі Зейнетақы мен жәрдемақы өседі