Шығысқазақстандық таэквондошы Катарда өткен чемпионатта жеңімпаз атанды

Мың жарымға жуық спортшы қатысқан байрақты бәсекеде жерлесіміз топ жарды, деп хабарлайды Устинка LIVE тілшісі.

"Дене шынықтыру және спорт" білім беру бағдарламасының 3-курс студенті Бекарыс Бекенов Катар астанасында өткен таэквондодан халықаралық ашық чемпионатта 1-орынды иеленді.

Жарысқа 40 елден 1440 спортшы қатысты. Жарыстың қатысушылар үшін маңызы зор. Халықаралық рейтингте есептеледі.

Бекарыстың таэквондомен айналысқанына 10 жылдан асты. Азия чемпионатынан бөлек басқа да ірі спорттық жарыстарда бақ сынады.

Мен бір жыл бойы қызу дайындалдым. Жүйелі жаттығу жасап, тиісті диета ұстанып, дұрыс режимде жаттықтым. Шынымен маңызды кезең болды. Дайындық өз жемісін бергеніне қуаныштымын. Жаттықтырушыма, барша жақындарыма және отандастарыма қолдау көрсеткендері үшін рахмет, — дейді спортшы.

Бекарыстың айтуынша, халықаралық аренадағы жеңістер жеке жетістіктер ғана емес, сонымен қатар С. Аманжолов атындағы ШҚУ спортшыларының жоғары дайындық деңгейін көрсетеді.