Қазақстан Жол құрылысын бақылайтын бірыңғай цифрлық платформа қажет
Бүгін Мемлекет басшысы Жолдауында осындай тапсырма берді
Биыл елімізде 12 мың шақырымға жуық жол салынып, жөнделіп жатыр, деп хабарлайды Устинка LIVE тілшісі.
Алдағы уақытта бағдарламаның ауқымы кеңейіп, тағы 10 мың шақырым жол қамтылады.
Автокөлік жолдарының жай-күйі – өзекті мәселе. Мен бұл туралы осыған дейін де айттым. Биыл елімізде 12 мың шақырымға жуық жол салынып, жөнделіп жатыр. Қазақстанда мұндай ауқымды жұмыс бұрын-соңды болмаған. Астана-Алматы, Ақтөбе-Атырау-Астрахань, Талдықорған-Өскемен бағытындағы күре жолдарды қайта жаңғырту жұмыстары аяқталып қалды, - деп атап өтті Президент.
Мемлекет басшысы атқарылып жатқан жұмыстың сапасына ерекше маңыз беру қажеттігін айтты.
2,5 мың шақырымға созылатын облысаралық және ауданаралық жолдарды орта деңгейде жөндеуге арналған бағдарламаның мән-маңызы зор. Дәл осы жолдармен жұрт өте жиі жүреді. Сондықтан бағдарламаның ауқымын кеңейтіп, оған кемінде 10 мың шақырым жолды қамтуды тапсырамын. Әрине, мұнда саннан гөрі сапа маңыздырақ. Сол үшін инновациялық заманауи әдіс-тәсілдерді кеңінен қолданған абзал. Бұл жұмысқа қоғамдық бақылауды күшейту үшін бірыңғай цифрлық платформаны іске қосқан жөн. Онда барлық жолды, соның ішінде, қала аумағындағы жолдарды салуға және жөндеуге қатысты ақпарат болуы керек, – деді Қасым-Жомарт Тоқаев.
