Шығыс өңіріне "Денсаулық" пойызы келеді

Пойыздың облысымыздағы алғашқы бекеті Аягөз ауданындағы Таңсық станциясы болмақ. Бұл жерге дәрігерлер пойызы 22 мамыр күні аялдамақ. Ал келесі күні Үшбиік бекетіне аттанады. 22-24 мамыр күндері Жарма бекетіне аялдап, тұрғындарды қабылдамақ. 26-27 күндері Жаңғыз-Төбеде, 28-30 мамыр күндері Шар бекетінде дәрігерлік тексеріс ұйымдастырмақ.

Пойыз сегіз вагоннан тұрады. Амбулаториялық операция мен толықтай тексеру кезеңдерін қамтамасыз ететін құрал-жабдықтар, процедуралық кабинет қызметі, диагностика кабинеттері мен лабораториялар орналасқан. 

Замануи медициналық құрал-жабдықтармен қамтамасыз етілген медициналық пойызда терапевт, педиатр, невропатолог, окулист, ЛОР, хирург, уролог, маммолог, стоматолог және гинеколог тәрізді дәрігер-мамандар тексеріс жасайды.

Барлық медициналық қызметтер тегін көрсетіледі. Дәрігерлердің жұмыс уақыты таңғы 9.00-ден 18.00-ге дейін. Ал үзіліс уақыты 13.00-14.00. 

Айта кету керек, Өскемен қаласына медициналық пойыз келмейді.