Облыстағы құрылысы жоспарланған жобалар

Шығыс Қазақстан облысында мемлекеттік жеке серіктестік бағдарламасы арқылы 139 млрд теңгені құрайтын 22 жобаның құрылысын жүзеге асыру жоспарланып отыр.

Аталмыш жобаларды жүзеге асыруға кедергі келтіретін өзіндік себептері де бар.

- Білім саласында 16 балабақшаның, денсаулық сақтау саласында 2 нысанның, ТҮКШ бағытында 2 нысанның және облысымыздағы 2 көпірдің құрылысы жоспарланып отыр. 2015 жылдың тамыз айында «Global Contract» компаниясымен 4,1 млрд соманы құрайтын Өскемен қаласындағы 6 балабақшаның құрылысы туралы келісімшарт жасалды. Оның жобалық-сметалық құжаттары жаз мезгілінің ортасында дайын болды. Алайда концесиянерлермен төлем әлі жүзеге асырылған жоқ, - деді Шығыс Қазақстан облысының өңірлік мемлекеттік-жеке меншік әріптестік орталығының төрағасы Шәкәрім Бұқтұғұтов.

Нысандардың құрылысы әлі басталған жоқ. Егер 12 желтоқсанға ешқандай шара қолданылмаса келісімшартты біржақты түрде бұзуға болады.

- Дәл осындай жағдай Семей қаласындағы 5 балабақшаның құрылысына да байланысты, бірақ оларда келісімшартты біржақты түрде бұзу мерзімі 19 жетоқсанға келіп отыр, - деп атап өтті Шәкәрім Бұқтұғұтов.

Сонымен қатар 35 млрд теңгені құрайтын 300 орындық көпсалалы аурухананың құрылысының сараптамасы жуық арада аяқталып, Астана қаласында бекітілгеннен кейін қайта конкурс жарияланатын болады.

- 300 орындық емхана және балалар ауруханасының құрылысына қатысты ешқандай келеңсіз жағдайлар орын алған жоқ. Тек қажетті мерзімдерден сәл кешігіп келеміз, - деп қосты Шәкәрім Сабырұлы.

53 млрд теңгеге құрлысы жоспарланған Виноградов көшесінен басталатын көпірдің алғашқы сараптамасы 2017 жылдың қаңтар айында дайын болады екен.

Амир Қиылмбеков