Кәсіпкерліктің дамуы - елдің өркендеуі

Жақында «Алтай» технопаркінде серіктестік бағдарламасы шеңберінде шағын және орта бизнесті көтеру, ШҚО-ның бизнес-менеджмент және индустриялық-инновациялық дамуы мен мемлекеттік-жекеменшік әріптестікті нығайту мақсатында «Казцинк ЖШС-нің» қатысуымен жиын өтті.

Елімізде нанын бизнеспен тауып жүрген жандардың жоқ еместігі белгілі. Біреуі киім-кешек шығарумен айналысса, бірі жиһаз жасауды кәсіп етеді. «Жұмыла көтерген жүк жеңіл» демекші бірігіп атқарылатын жұмыстың нәтижесі де жоғары болатыны хақ. Осы жайтты санаға түйіп негізге алған «Казцинк» ЖШС өкілдері барлық жиналған бизнесмендерді бірлесіп жұмыс жасауға шақырды.

- «Казцинкте» 22 мыңдай адам қызмет атқарады. Былтырғы жылы отандық өндірушілермен 95 млрд теңге көлемінде 700 келісімшартқа қол қойылды. Осы жылы да біршама келісімшарттар жасалмақ. «Казцинк» ЖШС тек қана облыс өндірушілеріне ғана емес, республикалық кәсіпорындарға көмек көрсетіп, мемлекет экономикасының дамуына өз үлесін қосып отыр, - деді «Казцинк» ЖШС-нің әкімшілік сұрақтар бойынша атқарушы директоры Андрей Лазарев.